Jaorraeje veurzitter 2024

12 Juni 2024.

Veur de viefde keer moog ich es eure verenigingsveurzitter van oos prachtige Sjtadsvastelaovesvereniging D’n Uul, de jaorraeje oetsjpraeke. De tied vluug, want nao ein prachtig sezoen mit väöl sjpas en plezeer gaon veer vandaag ’t jaormotto 2024 “nog eine en dan”, inrule veur ’t jaormotto van oos 8×11 jubileumjaor 2025. Det jaormotto en netuurlijk 8×11 kump later nog aan bod in mien jaorraeje.
De tied vloog ouch in verenigingsjaor 2024. Op ein paar daag nao vierde veer namelik ‘t kórtst meugelike vastelaovessezoen det volges de standj van de zon en de maon meugelik is. Det waas hectisch want d’r mósde ondanks ’t kórte sezoen väöl geregeld waere. Det deej mich weer realisere woróm ich döks zègk: ein sezoen van vief waeke nao de Nach eksklusief de Vastelaovesdaag is ech kórt. Zès toet zeve waeke is ideaal, ach toet nege waeke is lank. Mit alle reguliere en extra festiviteite in oos aansjtaonde jubeleijemjaor 2025 bön ich daoróm blie det veer in 2025 nao die ach waeke gaon, ich zól neet weite wie veer angers alles inein zólle kinne fiespernulle.
Trökkiekend nao Vastelaovend 2024 wil ich in ‘t bezónjer sjtilsjtaon bie inkele Uulezake. Óm te beginne wil ich zeker KUUL beneume, de eerste edisie van ‘t Katers Uul Leedjessjpektakel veur de vastelaovessjlager van Groot Remunj. ’t Waas ein geweldige eerste edisie en samewirking. In de veurbereijing en oetveuring ware d’r zeker leer- en verbaeterpuntje, mer op 2 of 3 november 2024 kump d’r ein vervolg en dit keer op Uule- gróndjgebied in ’t Witte Kirkske. Katers en Uule, top!
Ouch de tweede edisie “In de Sjpegeltent” waas qua opzat, entourage en inhajelik pergram top. Aevel behalve opzat, entourage en pergram waas ‘t ouch puur en allein qua inkomste prima en bienao gans volges prognose. Mer behalve sieferkes die mótte kloppe en wo zeker euver gesjpraoke mót kinne waere, waas de kwaliteit van “In de Sjpegeltent” 100% Uulwaerdig, dieke merci!
Nao KUUL in november begósde veer in jannewarie nao ‘n hectische tied veur ‘de Oranjerie’ mit ‘t prachtige rizzeltaat van de verboewing, mit ‘ne nuje opzat van de Nach en de Middaag. De floer van de theaterzaal waerde opgeheug en zo waas d’r ‘n bezónjer ambiance gekrejeerd veur ‘de Nach’ en ‘de Middaag’, ein unikum qua lokasie. Jaozeker, zo’n eerste edisie van de Nach en Middaag op dees meneer, höbbe oos kemissies en oos AB väöl inzichte gegaeve in waat nog baeter kin en mót. Veural waat betruf de inrichting en de extra aankleijing. Mer laot noe ’t glaas half vol zeen, want bieveurbeeld de besjikbare techniek en leech/geluid zeen ónoetpöttelik. Ouch geldj netuurlik de sjtèlregel det eder nuuj ivvenement noojt bie ein eerste edisie veur 100% sjteit. Dao höbs se döks twee of drie edisies veur neudig en dao kómme veer ongetwiefeld euver te sjpraeke. Behalve ivvenemente, ouch aandach veur Uulegezelsjappe.
’t Gajus, de Uulejónges van ’t eerste oer, waerde lanksaam get te groot veur de Uulejónges en höbbe zelf de mach gegrepe. Bie ‘t 8×11 gaon zie ‘n fees veur jeug organisere, dao durfde nemes taege te zeen. Benuujd waat veer van die jónge allemaol te zeen kriege…
Mit de link nao häör oetropinge begin jannewarie wil ich op dees plaats netuurlik gaer dank oetsjpraeke aan oos Aad Prinselike Gezelsjappe. De 79e en inmiddels Aad Sjtadsprins Joep I Seuren mit ziene liefsjpreuk ‘Neet toete, blaoze!’ en zien adjudante Ruben Kuijper en Sjtadsprinselike breurs René Seuren en Pieke Seuren. En naodet ein waek later de sjpanning good waerde opgeboewd toet de allerlèste sekónde sjting dao de 57e en inmiddels Aad Sjtadsjeugprins Dean I Adams mit ziene liefsjpreuk ‘Vastelaovestied, is Dean tied!’ en zien adjudante Ada Yarimbay en Mees Wagemans. Eine waalgemeinde dieke merci veur wie zie D’n Uul sjtraolend zeen veurgegaon mit tomeloze energie en daobie gans Remunj, jónk en aad, de vastelaovend höbbe gebrach. Chapeau en zeer väöl hertelike dank!
Tiedes dees jaorraeje kieke veer trök op verenigingsjaor 2023-2024 en veuroet nao verenigingsjaor 2024- 2025. Det waert netuurlik ein bezónjer jaor en wo veer tiedes de aafgeloupe twee ouch jaorraejes al op veuroet höbbe gekeke, ómdet oos vereniging kómmend jaor 8×11 jaor besjteit. Veer zeen dus neet allein siefermatig bezig mit ein jaorraekening en begroting, mer ouch inhajelik. Det is good, siefers zeen belangriek mer inhald en achtergróndj zeen nog belangrieker, want siefers allein zègke nieks en ‘t vastelaovesgeveul besjteit oet meer want de inhald zorg veur de belaeving. Netuurlik mót d’r bie D’n Uul euver siefers gediscussieerd kinne waere, dao sjtaon ich es veurzitter veur. Waat mich betruf waal in de samehang mit

inhald. En es ich inhald zègk, den hob ich ’t ouch euver oos toekómsbeeld. Es AB en DB höbbe veer naogedach euver de aanpak en d’r is ein apaarte kemissie mit de veurbereijing aan de sjlaag gegaon. Veuroetkieke en biesjture in ‘t verenigingsbeleid, waal mit resjpek en aandach veur ’t verleje. Det is waat veer mótte blieve doon om ein good functionerende vereniging te blieve. Waat NEET wilt zègke det alles mót verangere. Mer waal naodinke, ós aopesjtèlle en veuroetdinke. Want ouch nao 8×11 blief D’n Uul besjtaon. Róndjóm ‘t jubeleijem is väöl positieve energie en det mótte veer SAME gebroeke óm veuroet te kieke.
8×11, ’t is zo wied det veer nao 2014 weer ein jubeleijemjaor in gaon. Nao 7×11, noe 8×11 en sjoon det de Aad Sjtadsprins van oos veurig jubeleijem (Roger I Geurtz) noe veurzitter is van de organiserende kemissie. De Festiviteitesjtichting en ‘t kernteam 8×11 trèkke in samehang de ker. Periodiek minimaal 1x per maondj waert d’r aafgesjtump door ’t kernteam same mit ‘t DB en waere belangrieke zake besjpraoke en besjlaote en de koers bepaold. Boete die vaste momente waert d’r nog heel väöl vergaderd, geregeld, veurbereid en georganiseerd. Twee waekeindes Sjpegeltent op de Mert mit twee keer drie daag en aovende pergram en ein waekinj de revue “VasteLOVEnd Same”; det is de bedoeling. En den in november 2025 de oetreiking van de Gouden Narrekap in Remunj. Ich gaon ’t kernteam netuurlik neet wiejer veur de veut loupe en laot de inhald aan häör. Mer waat ich neet onbeneump wil laote en wo ich greuts op bön, is det ’t ’t kernteam 8×11 gelök is óm persies volges doelsjtèlling ein breid team van miense ein rol te gaeve. Vanoet ’t thema verbinjing kriege sameveuginge van kemissies of gezelsjappe ein rol. Vertroewe-mandaat-aafsjtumme-besjlissinge naeme en zo wie gezag periodieke aafsjtumming en sjturing door ‘t kernteam mit ‘t DB óm ’t grote geheel te bewake. Ich krieg al enorm väöl zin in 2025 want ’t is namelik neet zo mer get, 8×11 D’n Uul!
Al dees take en ouch in zien geheel de vereniging dreijende haje, det doon veer mit miense… väöl miense. Daoróm is en blief ’t belangriek óm nuuj miense te binje aan D’n Uul en häör ein plekske te gaeve in en bie de vereniging. Erg belangriek det det gebeurt in kemissies, ‘t AB en ouch ’t oettrèkkend gezelsjap. Op dees plaats ein eerder besjpraoke en dus herhaold zorgpuntj. In kwantitatieve (soms kwalitatieve) zin vreug oos bezètting en ‘t invulle van vacatures herhaold aandach. Dit puntj blief beneump en det wil ich hie ouch doon. ‘t Hulp det ’t aantal leje en zakelike partners blief sjteige. Aevel zeen ich ouch det ’t binne kemissies soms passe en maete is ómdet veer in hoge mate dreije op Uule die väöl veur de vereniging doon. Laot ós die greuj in leje en sjpónsore wiejer benutte en óm det te bereike höbbe veer ederein neudig. Alle kemissieveurzitters, alle AB- leje en ederein dae vanaovend hie is mit ouch goje Uule-PR.
Nog eine keer wil ich gaer hie ind dees jaorraeje in ‘t bezónjer sjtilsjtaon bie alle Uuleleje en häör enorm bedanke. (AB, kemissieveurzitters, kemissieleje, oettrèkkend gezelsjap, Sjtichting Sjtasiefestasie, Festiviteitesjtichting, Senaat, Aad Prinse Klup en netuurlik mien DB-kelega’s). Zie höbbe allemaol de sjouwers euveral mit ónger gezat.
Geachde leje, ich sjloet aaf. Waat mich betruf blief baove alle discussies verheve sjtaon det vastelaovend en veural D’n Uul altied mit aafsjtandj ’t sjoonste is, det veer altied vaerkrachtig veuroet blieve gaon en det veer nao “nog eine en dan…” noe ein prachtig jubelijemjaor 2025 mit 8×11 tegemoot gaon!
Laote veer same es Uule de sjouwers d’r ónger zitte óm d’r ein ónvergaetelik jaor van te make!! Ich dank uch veur eur aandach!