D’n Uul prizzenteert zich
Alweer veur ‘t viefde jaor rich Sjtadsvastelaovesvereniging D’n Uul in de binnensjtad ittelaasjes in én dit jaor veur de tweede keer ein ekstra exposisieruumte aan de Hamsjtraot 19. De äöpening van de ittelaasj én exposisieruumte is op zaoterdaag 12 november óm 10.33 oer door veurzitter/vórs Dirk I Franssen van D’n Uul.
Hie prizzenteert D’n Uul óngerdeile van häör ‘Vastelaoveskultuur en hiestorie’ mit dit jaor es hoofthema de Aad-Prinse van D’n Uul. Nog noojt zeen zoväöl memorabilia van Uule-Prinse bie-eingebrach.
Daonaeve is d’r in de vitrines ónger angere aandach veur de Raod van XI en de Technische commissie van D’n Uul. Op kunszinnig vlak is d’r ein exposisie van karikaturale teikeninge van ‘de Hamsjtraot mit vastelaovend’ van Gerard Nizet, aangevuld mit inkele unieke foto’s van die sjtraot wo vreuger bv. ‘t Uulenes loog. Ónger de titel ‘zeukplaetjes, wo sjleit det op’, waere bezeukers ouch aktief oetgedaag óm mit te doon. En tenslotte make de väöle unieke Uule-memorabilia, oet ‘t archief van D’n Uul of in broekleen, ‘t beeld van de ‘Remunjse vastelaovend’ compleet.
D’n Uul duit ouch dit jaor weer eine oproop aan die die nog Uulememorabilia oppe zolder höbbe ligke, óm deze te donere. Veurig jaor haet det bieveurbeeld ein uniek prinsekruuts van Prins Zjaen I Geradts oet 1948 opgeleverd en diverse beukskes, foto’s enz.
Äöpening en äöpeningstieje:
De ittelaasj is vanaaf de äöpening 24/7 vanoet de Hamsjtraot te bekieke. De exposisieruumte is van 10.30 tot 16.00 oer geäöpend op alle zaoterdage in november en alle zaoterdage vanaf Jannewarie toet aan de Vastelaovend. Antree is gratis.
Veur groepe is d’r ouch de meugelikheid óm op aafsjpraok de prizzentasie te kómme bekieke, eventeweel in combinatie mit ein kórte ‘vastelaovesróndjleijing’ in de ómgaeving van de Hamsjtraot. Ein tweede ittelaasj waerdt begin Jannewarie 2023 ingerich oppe Heilige Geissjtraot.
