“Sjpot op Vastelaovend”

Sjra Puts: Om Prins te waere 35 kilo aafgevalle.
Vastelaovend? es ich d’r neet bie bön geit ‘t neet door!

Dan mos-se toch waal helemaol van de pot gerök zeen wanneer se om prins van D’n Uul te kinne waere 35 kilo geis aafvalle! “ ’t Is det ’t om de jubielejumprins ging, angers hat ich ’t beslis neet gedaon!”
Hae mot-ter zellef om lache, Sjra Puts. Netuurlijk haet zien rigoereus diejeet nieks te make mit zien prinssjap, mer alles mit zien gezondjheid. “Maar ’t is netuurlijk waal sjoon mitgenaome. En trouwes, bön ich neet lekker sjlank in
det rokkostuum? Nou danne. Eine noe super sjmale kaerel van viefenveertig jaor is in ’t jubielejumjaor 6 x 11 de nuje prins van D’n Uul.

De zestigste Uuleprins, want vief jaor oorlog en de watersjnood in 1953 verhinjere det de jubielejumprins ouch de 66ste is! Gerardus Ignatius Mathias Puts, gebaore oppe Keuninginnelaan in ’t Veldj, jongste zoon van Sjra Puts zaliger en Lies Janssen die noe in ’t Godshoes woont. Zes kienjer hadde Sjra en Lies: drie maedjes, die alle drie good koste handjballe en drie jonges. Sjra zien moder is al 84 jaor maar nog poepfit. “Wit-se”, zaet de nuje prins, “mien moder kump oet Weert en dao kint sie ouch nieks aan doon. Maar as veer sjtrakkes mit D’n Uul nao de 7 x 11 jubielejumresepsie van De Rogstaekers gaon, naem ich mam mit. Die kint dan as tolk optraeje…!”
Eine echte Remunjse jong as prins van D’n Uul.

Allein, hae woont neet in Remunj mer in Zjwame, oppe Bossjtraot.
Sjra: “Ich woon hiej noe vief jaor. Nae, neet mit ein spesiejaal raeje. Geweun omdet Zjwame röstig is. Ich höb ein drök laeve en wil as ich eindelik toesbön mien rös höbbe. Nou en det vinj ich hiej aan de randj van de bos. Nae, euver ‘Zjwame bie Remunj: doodzunj’ laot ich mich neet oet. Bön nogal gek, zegk’.”De nuje Uuleprins is al 7 jaor getrouwd mit Karin Timmermans (4 x 11), ein wonjersjoon en leef blondj maedje. Karin waas jaorelangk ’t euverbuurmaedje van eure sjriever, ich kan ’t dus weite… Het wirk as sikkertaresse in ’t Greune Hoes bie de Miljeu Fidderasie. Sjra en Karin höbbe twee kienjer: Pieter (18) en Janine (15).

Vanwaege Pieter haet Sjra mit inkele anger miense de Sjtichting Van Os Veur Uch opgerich wovan hae noe veurzitter is. Dees sjtichting ongersjteunt miense mit ein sjpierziekte. Sjra euver zien vruike: “Karin waar mien jeugleefde. En nao inkele sjienbewaeginge höb ich ‘m trökgevonje. Ich kin ‘m al van de legere sjool. Witse det veer in 1971 al same in de optoch mitlepe? Op rolsjaatse en onger t motto “Alles löp op rölkes”, drie keer raoje waem in det jaor miene veurgenger waas…
Mien eerste kinnismaking mit Sjra Puts is van jaore trök. Ich waar mit Ria nao Heinsberg gewaes om te tenke en waerde aan de grens in Vlorop – van Schengen had nog nemes geheurd – taegegehaje door eine euverieverigge doewanjee: “Meneer, höb geer get aan te gaeve? Wilt geer de kofferbak effe aop make!” Wie ich oet ’t raempke van de auto keek, keek ich rech in ’t lachende gezich van…Sjra Puts. Want Sjra waar en is rieksambteneer. Nae, neet meer aan de grens, hae haet ongertösse promosie gemaak en zit noe binne. Sjra is bie de belastingdeens namelik ideejemennezjer.

Mer gans Limburg kint Sjra netuurlik as leedjeszenger en -sjriever (hae is bezig aan ziene derde ceedee), maker van radio- en tillevisieprogrammaas en prizzentator van ongerangere ’t Luiperke en de finale van ’t Limburgs Vastelaoves Leedjeskonkour.
Sjra waerde waereldberoemp mit schlagers as “Miene pap” en “Vlinders”. In Remunj kinne ze Sjra veural van dieverse bontje aovende, van Kuukskes Maondig en de Sjtasie Festasie (“meer volk as in Zoepkoel in Vinlo”). Wie mot det noe dit jaor, Sjra? “Geweun, persies as anger jaore. Ich bön toch in de buurt!”
Mit ziene in 1997 euverleje pap (Grote Sjra) haet Kleine Sjra altied ein spesiejale bandj gehad. Seniejor waar eine vastelaovesvierder in hert en nere: erelid van D’n Uul, grootmeister en jaorelank ’t gezich en ’t geluid van de Prinsekepel. Sjra: “Pap zag altied: ich gooi mit dien knäök nog de neut aaf”. Mit anger weurd: Ich waer veul ajer as dich! Och, laefde pap nog maar, man, dae zol greuts zeen. Dae dreijde zich om in zien graaf. Och, waat zegk ich noe, det kan helemaol neet. Nae, dae hing zich ’t grootmeisterkruuts om, ging op ein wölkske zitte en goof mich ziene zaege!” Baovesjtaonde bewies det Sjra vastelaovedviere mit de paplaepel binne haet gekrege. “Veer ginge altied allemaol op sjtap, behalve mam, die vormde ’t toesfront. Veur häör höb ich ooit “de sjpek mit eierbloes” gesjreve.

Waat vastelaovend veur mich is? Geweun, ich d’r neet bie bön, geit ’t neet door! Vastelaovend kump sowieso van ongeroet, vlinders in de boek witsewaal. Vastelaovend is ouch ein oetlaotklep en veur mich tegeliek ouch werk, mer waal werk wo ich lol aan belaef. En vastelaovend vier ich netuurlik in Remunj, nae neet in Zjwame, kom noe, zegk.” Sjra wit euverigges van heel doon bie wie hae zich as prins kan profielere. Hae waar namelik adjudant van ziene grote vrundj Rob Vossen in 1997. Det jaor haet d’r väöl kinne lere, as d’r teminste behalve Rob de vot naodrage zien ouge de kos haet gegaeve. Sinds ’97 is Sjra dus lid van ’t Aad Adjudante Syndikaat en noe alweer de viefde aad adjudant dae prins van D’n Uul waert.

Zien veurgengers ware Jo Leenhouts, Jos Rulkens, Jos Stoks en ongergeteikende. Womit ’t AAS vanaaf noe “de kraamkamer” van de Aad Prinse Klup moog heite… Sjra zien prinssjap sjteit – vanzelfsjpraekend in ’t teike van zien mediaaktiviteite. Ziene liefsjpreuk as prins is dan ouch: “Sjpot op Vastelaovend” en det kin-se dus nao twee kenj oetligke. Sjra: “De ganse sjtad is ein buun, ederein sjteit in ’t sjpotleech.
En zelfsjpot is ’t sjoonste sjpotleech wo-se in kins sjtaon. Miense die weite wie-se ech vastelaoves mos viere, kriege van mich ein mini-sjienwerperke womit ze zichzelf in ’t sjpotleech kinne zette. Daonaeve höb ich nog ein anger hoesorde: ein beukske in twee versies mitteks- en resjieaanwiezinge veur de Vastelaovend.
Om trök te komme op ’t begin van dit verhaol: om die 35 kilo euvertollig gewich kwiet te rake waerde Sjra lid van de Dieke Pense Klup. Anger leje zeen ongermeer tenjtrekker Leon Hamans oet Neel, Tonnie Meissen van de Janse Bagge Bend en autosjaai-ekspair Peter Brouwers. Wanneer die angere Sjra nao de vastelaovend sjorse as lid, dan haet D’n Uul eine sjitterende jubielejumprins gehad…

Hans II Straus

Sjpot op vastelaovend

PERSONEEL VAN DE PRINS
Mit de keus van zien personeel is de nuje prins neet euver ein nach ies gegaon. Mit zien adjudante en sjooffeur haolde hae zich veural ein duchtigge paorsie ervaring in hoes. Zien twee adjudante zeen namelik allebei al jaore besjtuurslid van D’n Uul.
t Hemp is nater as de rok, mot de prins gedach höbbe wie hae zien ajere broor Jo as eerste adjudant oetkoos. Jo Puts is vieftig, getrouwd mit Inge en vader van twee zeuns. Jo is dekaan en dosent informatica aan de Gilde Opleidingen. Hae is bezig aan zien leste jaor as lid van ’t dageliks besjtuur, verder is het lid van het beroemde Feskommitee.
Adjudant nommer twee, Harrie Wolters is ouch al inkele jaore lid van het dageliks besjtuur van D’n Uul. Same mit Jo Puts verzorg hae de sjrieverie veur ’t sikkertariejaat. Harrie is 46 jaor, getrouwd mit Anita en pap van twee kienjer. Hae is assuransie- adviesäör en kantoorhoof bie Huijerjans in Berg. Hae is ouch jaorelank lid gewaes van zate hermenie Volle Blaos en is noe muzikaal aktief bie Toet Zo.
Sjooffeur van de prins is Ton Hensen, 46 jaor, getrouwd mit Monique en vader van drie kienjer. Ton is seniejor mennezjer/verkeuper. Hae is lid van ’t algemein besjtuur van D’n Uul en veranjtwaordelik veur de oeters aktuwele internetsait van D’n Uul. Verder sjpeelt Ton döks toneel, ongerangere op de veurmalige bontje aovende van D’n Uul en bie De Speelgroep Gelre.