‘ne Sjtadsprins oet de binnesjtad’

‘Van hoes oet… Same vastelaovend!’

Deh, dao is d’r dan, de nuje prins van D’n Uul, rech oet ’t hert van de binnesjtad. Rogér II Linssen, vrundj van Pauline womit d’r twee helje haet: Bastiaan van zès en Frederieke van drie jaor. Oze veurgenger is ónger angere eigeneer van ‘MKLRS’: gooj dao get klinkers tösse en geer laes ‘MAKELAARS’. Hae verköp dus hoezer en de lèste tied gaon die weer wie werm breudjes euver de toonbank. Heel bewus duit d’r det allein in de gemeinte Remunj, want dao sjtaon natuurlik ouch de sjoonste hoezer…

Rogér II is gebaore in ’t riek van de Donderböl en eine daag veur Sinterklaos is d’r veertig jaor gewaore. ‘Dan geit ’t laeve pas ech beginne’, waert gezag, zeker wie det d’r door de prinsekeuzekemissie in juni al gevraog waar óm ‘De Nuje Veurgenger van Sjtadsvastelaoves Vereniging D’n Uul in 2018 te waere.

Duis se ‘t?
Det ging zo: Mark Moore belde Rogér op, want hae had get aan ziene fiets hange: “Kins se neet aeve nao de boerderie kómme?”. Ja, jao, dach Rogér, waat mót ich dao? Helpe bie ‘n vaers die mót kalve? En ziene paerssjtal verkoupe, det gebeurt ouch neet! Drie daag dinke, waat mót dae van mich, ’t zal toch neet zeen det……!? Dus op maondigmorge nao Azeraoj en nog neet halverwaege, riet Marnix I veur ‘m. Det is toeval maar toch….? Sjtökske verder getank op de Maasbrök, bie pómp 11, sodeju det waert meines. En jao heur, Mark sjteit al nao ‘m oet te kieke en nump Rogér mit nao de keuke. Dao zitte achter ‘n tas kóffie Stefan I en Tanja ‘m al op te wachte. Och jee, waat noe? Dus toch…….!? En toen noom Tanja ferm ‘t waord mit de al geneumde vraog…….!
“Det wil ich gaer” zag Rogér “maar det mót ich thoes waal efkes good aanligke”.
Drie daag later ónger de daekes, ’t sjlaope ging toch al neet meer zo gemekkelik, waerde Pauline ingelich euver meugelik de sjoonste vraog die ’t mit Vastelaovend kint gaeve. Poeh, poeh, det waar nog efkes alle zeile bie zitte, want Rogér haet dus twee poete, ‘n tapasbar in de Bröksjtraot die in september geäöpend waert, ‘n verboewing en verhoezing van de Neersjtraot nao de Zjwartbrooksjtraot, ‘n woningmert die óntplof is en ‘n verhoezing en nog ‘n verboewing van e nuuj kentoor op de werf.
Nao ‘n oer klasjenere gif Pauline ’t verlossende waord: “Doot ‘t, maar zorg des se ’t geregeld kriegs” en zo kós d’r mit e gerös hert nao Toscane op fekansie óm dao de sjterre sjnachs te bekieke, want in sjlaop valle waar d’r neet meer bie.
Wie Rogér op de trökwaeg weer de Maasbrök euver reej, sjprónge ‘m de traone in de ouge. Oze prins is ‘ne echte Remunj leefhöbber.

Remunjse jóng
Wie d’r op Schöndeln havo en op de de Breijewaeg (Braodway) vwo had gedaon, is d’r ein nach ‘op kamers’ gewaes in Nijmege. Bäökend kwaam d’r trök nao Remunj óm weer door mam de bótteram te laote sjmere. Boete Remunj laeve veel zo taege det d’r ‘n belangrieke laevesles had geleerd: ‘Remunj veur altied’. En e paar jaor later sjtudeerde hae aaf veur Makeleer in Eindhoven in de tied det de hoezer e jaor of drie te koup sjtónge…..!

Rogér zie moder Marianne kwaam oet ‘Prinsenbeek, waat natuurlik gei toeval kint zeen wiewaal häör moder, Hubertine Bruynen, van de veursjtad Sint Jacob is.
Toen de moder van oze veurgenger nao Remunj verhoesde leerde zie Rogér ziene pap al rap kinne. Dae waar de ein-nao-aajdste van de vief breurs Linssen van de Hendriklaan in ’t Veldj. ‘n Echte horeca- en brandjwaerfemielie. Opa Linssen en veer van zien zeuns höbbe heel get jaore in Remunj de eine nao de angere brandj geblus. De pap en mam höbbe jaorelank ‘t “Munstercafé” op ‘t sjoonste plein van de waereld gerund. En dan nog ome Huub, dae haet zelfs nog de Paerssjtal en Brandjpunt besjtierd. Veer kinne dus sjpraeke van ‘ne echte Remunjse jóng mit dao-in Remunjs blood. En as veer nao Pauline kieke: e Neelder maedje, opgetrókke in ‘t Katerriek. Ziene pap, sjoester Thei Kessels oet Neel, is óngertösse mit zien sjoon sjoon in de Neersjtraot, mit oetzich op de Roerbrök, neergesjtreke. Pauline’s moder, Doriet Vullers, die de sjoonste pekskes ineinfiespernult veur häör kienjer en kleinkienjer kump van oppe Ruiver. Doriet wón in 1995 al ‘t ‘Neelder songfestival’ mit ’t leedje ‘Ós Mam’ op meziek van Arnold Wassen. ‘t Liek waal of alles in ’t wèrk is gezat óm oeteindelik Rogér in de adelike sjtandj te verhöffe.

Rogér en Pauline laepele bie häör koters de Vastelaovend nao binne, want mit Vastelaovend zeen ze zo väöl meugelik same op sjtap. Bastiaan knip, plek, raekent en kleurt op Basissjool ‘Aan de Roer’ wo Frederieke in april ouch haer geit. Waat zal ’t e fees gaeve as Rogér II dao op vriedig veur de Vastelaovend de boel op sjtelte kump zitte. Det waert polonaise door de gymzaal mit prinske Bastiaan I en prinsesje Frederieke aan de kop, dus nog véúr oze Prins.

Waem waert adjudant?
Wie eimaol jao waar gezag taege de meis geheimzinnige kemissie van D’n Uul, waerde de adjudante gevraog. Marvin I (Koolen) Kaketoeprins in 2016 ‘Sjerve bringe gelök!’ is ‘ne sjoonbroor en ómdet Rogér dem as adjudant de vot haet naogedrage, waert die ról noe ómgeruuld. Dan door nao Joost Houben dae al vanaaf de kleutersjool ziene vrundj is. Dao kump nieks tösse. Joost waar veur zien notarissjap jaorelank kastelein van ’t Kelderke en kefee ‘EnZo’. Ruud Beurskens, al ruum 20 jaor eine van Rogér zien bèste vrunj, heurt ouch bie de vaste clan, womit veer de hulptroepe van de Prins bie-ein höbbe.. Óm de beurt waert d’r sjefäör gesjpeeld, zodet d’r dit jaor ‘n functie as BOB-adjudant geit óntsjtaon..
Mit zien adjudante haet d’r e sjluupke gekoch det bie Nautilus lik. Dao vare ze dan Moder Maas en de plasse van Remunj mit op, effe óngerein…

Dweijele in Remunj

In zien lèste tienerjaore maakde Rogér deil oet van ‘ne grote groep vrunj die van dónderdig-toet zóndigaovend de kefees róndj ‘t Sjtasieplein ‘aafsjlingerde’. Van ’t Kelderke nao ’t Häöfke dan bie de Baog aan de gaam hange en altied weer trök nao ’t Kelderke wo Joost de lèste of ein-nao-ein-nao lèste insjödde. Ze hadde zelfs ‘n lamp mit twee glazer as logo bie zich óm bie te sjiene!?
Mit Vastelaovend waar ’t neet angers: van vriedig Sjolefestasie toet en mit ’t aaftraeje van de prins ging ’t los. Óngerwaeges ginge de kienjer döks mit de moders nao hoes, zodet de kaerels efkes óngerein ware en sjterke verhaole kóste vertèlle mit twee glazer beer veur de naas….! En as det op de WC van de Amstelclub mós, dan waerde de verhaole allein nog maar sjterker. ’t Prinselik gezelsjap van dit jaor genuut van echte sjaele zeiver.
En wie d’r nog gein kienjer gebaore ware, ginge ze toch al (of waar ’t nog sjteeds) nao de Sjnapsnaze bie Nolle óm achteraan ’t lollige bal mit te belaeve.

Ridder van de Rónj Taofel en ‘n Tapasbar
As zakeman zit Rogér neet sjtil. Naodet d’r weer ‘n hoes verkoch is, kint d’r in zien eige tapasbar ‘Café Sevilla’ in de Bröksjtraot e good glaas wien drinke. ‘n Eige Tapasbar waar ‘ne echte druim van oze dórsluchtige hoogheid. Ouch is d’r vice veurzitter en kómmend jaor zelfs veurzitter van de serviceclub ‘Ronde Tafel Roermond ’74’. Die klasjenere óm de anger waek bie Castello Hattem of L’ Union en sjponsere eder jaor gooj doele door aktiviteite te organisere.
Veur de tweede keer zal Rogér II aan de optoch mitdoon en dit keer mit ‘t äöpeningsnummer. ’t Zal e hoogtepunt waere mit name ouch, ómdet in ’t jaor van zien adjudantsjap bie Marvin I (2016) de optoch veur de tweede keer sinds 1945 aafgelas waerde vanwaege sjtorm, raege en hagel. Veurig jaor trók d’r veur de eerste keer mit óm det Marvin I de sjaaj van de aafgelasde bóntje sjoet toen inhaolde. Zien twee vaere veur mood en troew zalle op zien prinselike möts op en neer vlege. ‘n Möts die opgeboewd is oet de basiskleure van Remunj, wit en blauw en daobaove in driekleur rood, gael en greun, want daomit waert de Vastelaovend oetgedrök.

De sjpreuk en ‘n sjpang

Ziene liefsjpreuk haet gei riem, det is namelik neet ‘Uuls’ en daomit is d’r ouch kórt, maar waal oet ’t hert: ‘Van hoes oet… Same vastelaovend!’. Det beteikent veur Rogér II ’t oetdrage en belaeve van Vastelaovend, gaon as einzelgenger, in ‘ne kleine of ‘ne grote groep. Allemaol same mitein! Oze dórsluchtige hoogheid vult verder aan: “’t Geit neet óm mich, maar natuurlik bön ich waal de kertrekker”. Van ‘hoes oet’ benaodrök ’t wèrke mit hoezer maar nog meer ’t besef det de tradities van Vastelaovend van hoes oet mitgegaeve zeen. En natuurlik det ’t allemaol gebeurt vanoet zien eige hoes.

Van dao-oet geit ederein Vastelaovend viere. Veur Rogér II is dit vanaaf de Zjwartbrooksjtraot in de binnesjtad.
Dan leut de prins greuts zien óngersjeijing zeen. ‘n Sjoon sjpang die de skyline van Remunj haet in Uule-blauw, wie angers, en ‘ne blauwe sjlinger dae de Roer oetbeeld wo aafgeloupe jaor in gezjwómme waerde tiedes de ‘City Swim’. Rogér deilde dao as lid van de ‘Rónj Taofel’ badmötse aan de zjwummers oet. Sjoon vónj d’r det juus hae as de nuje Sjtadsprins vief Aad Prinse te weite Sybert I, Rob II, Kes I, Martijn I en Math I die badmöts aanreikde.
“Die sjpang kint nog jaore mit” zaet de prins, dus hae haop det euver e paar jaor op minnig jeske of damesbluuske de medalie van dan aad-prins Rogér II nog zal blinke. Oze nuje veurgenger is dus waal e bietje greuts en det moog, want hae is oze Prins, oze veurgenger, oze dórsluchtige hoogheid, hae is Prins Rogér II van Sjtadsvastelaoves Vereniging D’n Uul 2018.

‘Van hoes oet…
Same vastelaovend!’

Math (I) de Ponti

Adjudante:

Marvin Koolen, 31 jaor aad,
samewonend mit Sanne,
vader van Fleur (nog gein jaor).
Glaaszitter bie zien eige bedrief Koolen Glasreparatie in Remunj,
Aad Prins van de Kaketoes in ’t jaor 2016 mit es adjudant Rogér II.

Joost Houben, 39 jaor aad,
samewonend mit Inge,
vader van Nick (7 jaor) en Julie (4 jaor).
Notaris in Weert bie Malherbe Houben Kuijper Notarissen,
vreuger 12 jaor op ’t
Sjtasieplein gewirk, eers bie ‘t Kelderke en daonao bie Cafe & Zo.

Ruud Beurskens, 41 jaor aad,
samewonend mit Ilona,
vader van Rens (12 jaor) en Raf (8 jaor).
Verkoupmanager in Eindhoven bie BPD Ontwikkeling,
achterkleinzoon van Pette Piet van de Hamsjtraot.

Belangriek detail is det dees drie adjudante in dit sjrieve as zodanig betiteld zeen, want det besjpaard ’t AAS ‘ne houp gedoons. Dees drie kinne nao aafloup officieel sollicitere óm bie ’t Aad Adjudante Syndicaat opgenaome te waere.