Roger I (Geurtz)
Eine “Heëlesje wink” weijt door Remunj!

“Gans… of gaar neet!”

Prinse diej oos sjoon vereiniging veurgaon in ein jubileijemjaor, motte beheurlik get in häöre mars höbbe, det is ein feit det zeker is. Vraog ’t mér aan Sjaak (2×11), Jos (5×11) en aan Sjra (6×11). Veer zeen bliej uch ooze nuuje 7×11 jubileijemprins hiej te moge veursjtélle. Want waat veur eine! Ziene naam is Roger I. Hae regeert onger ’t motto “Gans… of gaar neet!”.

Es hoofredaktäör van ‘t Zjwetskammezaol kumps-se op de aafgelaegeste plaatse. Dees reis, leef uule, veurde de waeg mich door de decemberse duusternis nao Ech. Ech, det ligk neet veur de deur, dao mosse de wage veur pákke, dao mosse de sjtad veur oet … det kós lieters benzien!

Eine oetvlegende uul truf zien maotregele, mér ondanks det sjlaagde ich d’r in om dao aangekómme paaf de verkeerde kantj oet te vare, Pey in. Sjtel uch veur: bienao had ich uch eine gek van de Aester Sjaelen Uul es nuuje prins veurgesjteld. Kerdjuu, waat mót eine Remunjse uul ouch in Ech!

Mér alla, de nuuje prins, dae wis ’t waal … Dae hanjelde oet beleid wiej hae mich bie zich neujde … En zo wiej det geit, dórslöstige ouge dwinge. Dezen aovend waas op twee waeke tied d´n insigste det hae meugelikheje had veur ein interview. Nou nou, det is ein drök ménke, dách ich nog. Daezellefde aovend zólle de sjtasiefoto’s waere gemaak …. Ziene leeftallige partner zól kómme … Adjudante en sjofäör zólle aansjuve … Dan kinsse waal hoofredaktäör zeen van ’t sjoonste en meis tradisierieke vastelaovesblaad van ’t lándj, mér taegeneuver zoväöl inbring is nieks in te bringe. Dus ich nao Ech …

Miene naam? Dae zégk ich neet

Aan de tillefoon, twee waeke daoveur, heurde ich ziene naam veur ’t eers. Om dem pries te gaeve, det kósde de neudige euverwinning, want de Prinse Keuze Kommissie – dit jaor weer van ongeaevenaard kaliber mit grandioze uule wiej Kes, Hans (IV) en Allard – had hem op ´t hert geduujd det t’r ziene naam aan nemes moogde mitdeile. Gelökkig kós ich hem mit inkele good gekaoze argumente euvertuge det toch te doon, want wiej wilsse angers ein interview haje!? Noe is gelökkig de tied gekómme om de erekode – en daomit ´t zjwiege – te doorbraeke. De prins kan van hérte “Oehoe!” rope! De naam van Ziene Dórslöstige Hoogheid is: Roger Geurtz.

De kinnismaking vónj plaats op ein van zien kentore. In ’t dagelikse laeve is Roger registeraccountant en directeur Advies bie Accon AVM, ein firma diej ouch in Remunj ein kentoor haet. “Adviseurs en accountants” sjteit op zien visitekaertje, en “ruumte om te ongernaeme”. De prins is dus ein saort van edelcentefoekser dae ongernaemende luuj hulp om de belastinge en anger finansjele aangelaegeheje nao tevrejeheid aaf te wikkele.

Euver kómme weije oet Haerle

De prins is in ’t revolusiejaor 1968 in Haerle gebaore en noe 45 jaor jóngk. In de Oostelikke Miensjtreek (Haerle, Brunssum, Merkelbaek) is hae opgegreujd, mér daomit is neet gezag det hae in Remunj eine onbekinde is. Sins ’t begin van de jaore 90 woont hae namelik al onger ós: eers aan de Neersjtraot, in ’t wérme sjtadscentrum, later aan de Hambaek, eine tössesjtop, en allewieles aan Roerzich.

Mit partner Muriel (achternaam: Consten, ze zeen neet getrouwd) haet hae twee kienjer, ein maedje, Marijn (13 lentes), en eine jong, Rutger (11 lentes). Roger en Muriel zeen ein koppel sins de tied in Merkelbaek. Mér waat kint det bómme! Noe zeen ze helemaol van Remunj, van ós!

Fiscus

Toch aeve truuk. Wiej raakde Roger in Remunj verzeild? Det kwaam door zien éljers, vertelt hae. Pa wirkde in Mesjtreech bie de Belastingdeens en mós vanaaf ein gegaeve moment in Remunj zien brood gaon verdene. Einmaol hiej trók zien moder eine lingeriewinkel aop aan de Neersjtraot. Det waas in in ’t jubileijemjaor 1992 (5×11, mesjiens herinnert geer uch det …).

Op basis van dees informasie konkludere veer uulige intuïtie det Roger erfelik belás is en det de centefoekserie hem mit de paplaepel is ingegaote. Det bliek te klóppe. Eerlik is eerlik, de leefde veur de fiscus kwaam nog veur diej veur Remunj. Roger wirkde in de jaore 80 zellef ouch eine tied langk veur de Belastingdeens in Mesjtreech en sjtudeerde dao onger angere veur Rieksaccountant. Oeteindelik koos hae toch veur de advieswaereld. Det gaajde hem meer.

Vastelaovend in de sjtad

Daen eerste Remunjse vastelaovend in de jaore 90 waas get bezonjers! Hiej ging de Prins en zien maedje ein lémpke bránje. Det ging d’r hiej toch waal effe angers taegenaan es dao wo ze vanaaf kwame! Mit de Remunjse vastelaovend waas ‘t leefde op ’t eerste gezích, veur allebei. Ziene Dörslöstige Hoogheid waas, nao eige zégke, medein verkóch. Allewieles is ’t koppel neet meer weg te dinke wo get te doon is: De Nach, heerezitting, vrouwluujzitting en kwartjesbal beveurbeeld, de Ammie zowiejzo, en netuurlik de Vérkesbál. Op zondaag ginge ze vreuger nog waal ins nao Mesjtreech. Mér det is noe passé.

Heudjes

Ein sjoon anekdote oet de beginjaore. Eine gooje vrundj had mit oetgesjtreke gezích gezág det ze zich veur de Vérkesbal neet hoofde te verkleije. Doodérns waas hae gewaes. Ze vónje aevel det ze toch gét mosde doon, dus waerde kleine Tiroler heudjes gekóch en opgezát. En mit det es insigste carnavaleske accessoire kwame ze de zaal aan ’t Sjoolpaad binne. De rés kint geer uch bedinke. Tösse al diej verkleijde veulde ziej zich sjoon besjete! Zo get euverkump häör noe neet meer.

Passie

Later in oos gesjprek vélt op det Muriel zien enorme passie veur de vastelaovend neet maskeert en hongerd-oet vertelt. Euver zien optraeje in d’n optóch van veurig jaor mit de MILF-garde (MILF sjteit veur Moder Is Lekker Feeste!). Het veurop en de toekumstige ZDH d´r-achter aan.

En euver häöre jongste, dae mit vastelaovend op sjtapel is gezát in de vurige haop det hae op de ellefde van de ellefde zól waere gebaore! Drie daag zoot ’t t’r oeteindelik naeve…

Run(dje)

Euver ooze prins, Roger, es pebliek optraejend privépersoon, zeen weiteswaerdige zake te vertélle.

Zo waas hae toet zien 40e laevesjaor aktief bie de Junior Kamer. Same mit Maarten Bakx (noe adjudant) en Hans Brouwers richte hae de Medior Kamer op, wo hae de eerste veurzitter van waas en toet op gevorderde laeftied lid van moog blieve. Veur de Rotary (dao waas hae eine tied langk ouch lid van) haet hae de Roermond City Run opgezát (eine wedsjtried veur hel luipers). Worom? Euveral hadde ze ongertösse eine run, allein Remunj had t’r geine! Roger besjloot det dae d’r zól kómme mit de Rotary dragend gezélsjap. Gein sumpel rundje róndj de kirk, nae, eine volwasse luip mos det waere. Omdet hae dinger leever good en neet euverhaos duit, waerde ein jäörke mit de prémière daovan gewách. En toen begós ‘t. Ongertösse weite veer waat t’r van gewaore is: ein fantasties evenement veur jóngk en aad diej kinne en wille bewaege!

Naodet hae zien derde jaor es trekker gehad haet, haet Roger’t veurzittersjap euvergedrage aan eine bekwaome opvolger. Det creëerde get meer lóch in ziene agenda. Tied dae hae good kint gebroeke. Mit deze prins is dus get aan te vánge.

Skepter

Kint hae dan ouch mit de skepter zjweije? Hae is direktäör bie ein groot accountantskentoor, mér moogde geer nog twiefele, weit dan dit. Roger is al 8 jaor veurzitter van NIP, oos Remunjse tennis-jeweel det binnekort zien 100-jaorig besjtaonsjubileijem viert.

Netuurlik zjweijt hae bie NIP regelmaotig mit zien racket. Det sjient hae neet onverdeenstelik te doon. Zien adju’s weite te vertélle det hae eine geveerlikke backhand haet. Ziene opsjlaag is heel erg bekeke en geplaats. Kiek dao veur oet!

Interessant detail: Prins en adjudante zitte allemaol ouch in de jubileijemkommissie, de JUKO, van NIP. Vanaaf september, wiej Roger door D´n Uul gevraog waerde, haet diej gedeend es dekmantjel veur de bie-einkomste van oos nuuje prinselikke gezélsjap. Diej sjtinge es “JUKO” in de agenda’s. Wo kwame ziej bieein? Geer raojt ‘t: netuurlik in Ech.

Rurtaler

Ut Derde en zeker meis verrassende facet van ooze nuuje Dórslöstige Hoogheid is zien oetveurend zangtalent. Jao, geer laes ’t good. Noe mot waal d’r-bie gezag zeen det ich mich neet in persoon daovan höb kinne euvertuuge … mér de verhaole – diej veer hiej in sjterk aafgezjwaakde en gecensureerde vorm euverbringe – lege d’r neet om. En let mér ins op waat deze vastelaovend gebeure geit!

Roger is ein derde deil van ’t Roertaler Trio det zich sjpesjaliseert in ‘t “aprésski” genre. Op ’t Oktoberfees höb geer häör vocale prestasies kinne beloestere. Pikant zeen de herinneringe aan de Häörder Vrouwluuj Zitting, nog neet zo langk truuk. Dao moogde de drie boys optraeje es letste act van d’n aovend, naodet de zaal waas opgewérmp door male strippers en travestie show. Op ’t podium waerde ziej door wildj gebaerende vrouwluuj belaag en mit de rögk taege de moer gezát. Ze dachte nog: “Wiej kómme veer hiej veilig weg?!” Det lökde toch nog ondanks de opgedronge intimiteit van ‘t optraeje. In de kleijerkamer bleek det alle knuip van ziene jas gerete ware …

Druim

Remunjse sjtadsprins te waere waas al lange tied eine druim van Roger. Mér ’t waas zeker gein sjtille ambisie. Al sins jaore sjprik t´r mit zien vrunj d’r-euver. En es hae d´r neet euver begós dan deje ziej det waal! Ze sjpekuleerde, verdeilde de póste. Det ’t noe éch zien deil is gewaore, is geweun fantasties!

Dit Prinselik Gezélsjap is samegesjtéld vólges de klassieke suuksesformuul. Daobie mot waere gezag: ouch dit zeen sjtök veur sjtök jónges van kaliber. Roger haet twee adjudante (Gert van Heuvelen en Maarten Bakx, in ’t dagelikse laeve interim manager bie ein investeringsmaotsjappiej resp. direktäor van ein bedrief det duit in aafvalwaterbehanjeling) en eine sjofäör (Jeroen Tinnemans, boewongernaemer).

Puntjes op de “i”

De vastelaovend in ’t kader van 7×11 waerd door deze Prins en dit Prinselikke Gezélsjap mit ongekinde precisie aangevlaoge. Nog noojt teveure waas de proklamasie zo vreug klaor. ´t Aaftélle van de daag vélt zjwaor, mér de Nach kump t’r aan. Aan de maillot en de poefbóks zal hae taege daen tied haopelik gewind zeen. Det geit hem zeker lökke, want dit jaor waere de puntjes op de “i” gezát. Veer zálle ’t zeen.

Alles gebeurt onger ’t motto: Gans… of gaar neet! Det liek ein keuze mér is ‘t neet. Det waerd dus: gans. Dao kint geer vergif op innaeme.

Jean-Philippe Laugs