“Mit ein brilke oppe naas Iinks de träöt en rechs ‘t glaas”

Paul II Hamers waas Jeugprins, is zoon van eine Aad Prins en sjpeelt in Prinsekepel.
Nao de “boetelenjers” ” is ‘t noe biej D’n Uul weer “eige volk eers”

Det höbbe ze biej D’n Uul nog noojt mitgemaak: de nuje Prins waas oojt (1979) jeugprins en is de zoon van eine Aad Prins. Daobiej sjpeelt hae al 25 jaor in de Prinsekepel en is ouch nog ins Grootmeister van D’n Uul. Veur de keus van ziene 62ste Sjtadsprins haet D’n Uul veur ‘t eers in jaore weer ins ónger zien eige vleugels gekeke. Mit ein uniek rizzeltaat dus. Eindelijk weer eine echte Uul, eindelijk weer eine echte Remunjse jóng. Nao “boetelenjers” as Ghiel Pijpers (Haerle), Chrit Lambriex (Zittert), Raymond Reijners (Herte), Sjra Puts (Zjwame) en Sybert van Keeken (Gelaen), geit de insigste echte Sjtadsvastelaovesvereiniging mit Paul II Hamers trök nao zien ‘roets’. ”Eige volk eers” dus en det haet nieks mit Pim Fortuyn of mit Vlaams Belang te make…

Es se de naam Hamers in Remunj leuts valle, dink ederein metein aan D’n Uul en aan vastelaovend. Neet zo vraemp, want Paul ziene pap Thei waas prins van D’n Uul in 1974. Nao zien prinssjap haet Thei zien sjpaore verdeend as jaorelank begeleijer en zjwoengmaeker van de Prinsekepel. D’n Uul beneumde Thei neet veur nieks toet Grootmeister en Erelid. Aevel de nuje Prins Paul II, dae gelök- kig väöl baeter plat sjprik es zien vader mit det Haagse Hopjes-aksent, haet ‘t echt vastelaovesgeveul eigelik van zien moder: Rietje Gubbels, sjarmante dochter oet ‘t riek Remunjse piepe-gesjlach. Rietje sjreef en regiesseerde – same mit Ton Nelissen – 24 jaor langk de biejzónjer gesjlaagde Kienjermiddaag van D’n Uul, wirkde mit aan de Bónjte Aovend , sjreef de sjlager ‘Zeet geer Uule?’, waas oprichster van de beruchde Batterbende en waerde veur al zeen verdeenste door D’n Uul beneump toet Eredame en Erelid. Rietje haet zich biej D’n Uul onsjterfelik gemaak door mit Paul en Frank (35) twee zeuns oppe waereld te zitte diej d’r same al bekans ein kwaart eew veur zorge det de Prinsekepel van D’n Uul ein van de bèste zo neet de alderbèste kepel van Limburg is.Es hele groep kreeg de Prinsekepel al ins de Orde van de Zilver Buut van de SLV. Häör muziekaal opleijing krege de Hamers-breurkes van häör eige moder want die haet ‘t konservatoriejum aaf en verder biej de Keuninklikke van Remunj.

Het prinselik gezin: Monique, Paul en de kiendjes Eunice, Juul en Loek

De nuje Sjtadsprins is 36 jaor, opticiën van zien vak en duit same mit zien broor Frank de brillezaak oppe Hamsjtraot. Hae is al twee jaor getrouwd mit Monique de Bock (34), dochter van Jo en Lia de Bock-Laarmans. Paul II is vader van drie kiendjes: Loek (4), Juul (3) en döchterke Eunice (1). Twee jaor getrouwd pas? Paul II: “Jao, veer höbbe jaorelangk gehok, allebei eers de kater oet de boum gekeke en geveuld waat veur vleis veer in de henj, naem mich neet kwaolik, in de kuup hadde”.Paul en Monique höbbe zich lere kinne in de Amstelclub: “Dao zote os elders waal ins same aan de baar”. Prinses Monique, langk, sjlangk en blóndj, haet ‘t vastelaovesgeveul ouch neet van vraemde: zien vader, Jo de Bock, waas jaorelank sentefoekser van D’n Uul en is noe nog lid van de Raod van Ellef. Zelf dansde Monique mit zien zösterke Vivian in de kienjergarde. Paul II Hamers wit detter op 22 juni 1968 in Remunj gebaore is, mer hae wit neet wo persies: “Ich gluif in die flats oppe Sjpaorlaan die ze noe aafgebraoke höbbe”. Monique ongeluivig: “Des doe neet wits wo des se gebaore bös. Det guf ‘t toch neet!’ Paul kint zich waal nog van alles herinnere van zien jaor as Jeugprins: “Veural det ich saoterdaags de kirmes moogde äöpene en daonao van pap ein rundje moogde gaeve in kefee Astoria oppe Mert.”

Nao ‘t BC Schöndeln, deej Paul de MEAO en volgde daonao de optiekopleijing in Rotterdam. Daonao leerde hae ‘t vak biej versjillende brillezake in gans Limburg. “Ein paar jaor geleje haet mien vader de zaak euvergedrage aan mien broor en mich. Offesjeel is pap dus oetgesjeijd, mer waal edere mórge om hallef nege oppe zaak! Hae duit de admienestrasie en dao zeen Frank en ich mer get bliej mit. Kinne veer os helemaol gaeve op de klantje en op ‘t maete van de uig en de kontaklenze.” Vanzellefsjpraekent regeert Paul II Hamers ónger eine sjpreuk det alles mit zien vak en mit zien hobbie te make haet: “Mit ein brilke op de naas, links de träöt en rechs ‘t glaas…” , teks geleend oet Pierre Huyskens ziene sjitterende evvergrien ‘De Einzelgänger’. Wiewaal Paul II Hamers al dökker geneump waerde es kandidaat-prins, sjloog hae toch sjtiel achtereuver wiej de prinsekeuzekemissie van D’n Uul oppe sjtoep sjting. “Noojt gedach en toch gekrege. ‘t Is eine jeugdreum van mich dae noe inins oetkump.

Eers es Jeugprins moge preuve en dan noe ‘t echte, grote werk. Mien moder gluifde ‘t neet wiej ich ‘t häör as eerste vertèlde. Ze vroog drek waat Monique d’r van vónj. En waat vónj Monique d’r van ? “Ich vinj ‘t sjitterend veur Paul, hae wól ‘t zo gaer. Mer drek dach ich: waat kump d’r op dich aaf, veer höbbe drie kienjer. Wie mót ich det allemaol geritseld kriege? Gelökkig is ‘t ein heel kórt sezoen. Angers had Paul ‘t ouch zakelik neet rónjdgekrege. Vanwaege de sjteun van zien vader en zien broor lök ‘t net.” Waat is vastelaovend veur Sjtadsprins Paul II? “Op sjtap gaon, träöte mit mien sjuuftrómboon, nieks aan de kop höbbe, allein sjaele wazel verkoupe en Asselegoonsdaag gezóndj weer op en aan de sjlaag. Ich höb neturelik de mazzel det ich lid bön van de Prinsekepel. Ich weit ouch det eine Prins zónger meziek bekans nieks veursjtèlt. Mer as se mit de kepel binnetrèks óntplof de zaal of de kefee. Herelik! Meziek is versjrikkelik belangriek. Ich bön de kómmende waeke dan waal Prins, mer ich haop aaf en toe toch ouch ins mit te kinne sjpele.
Det mót ‘t protekol mich toch toesjtaon?

Waat vinjt de nuje Prins sjoon aan de Remunjse vastelaovend?

Paul II: “De Sjtasie Festasie neturelik. Det is super. Dao moge veer Uule allemaol greujts op zeen. Waat ein fees veur sjtrakkes mesjiens waal teendoezjend luuj. Veer moge greujts zeen, mer mótte ouch oetkieke. Oetkieke det veer neet de klós waere van ós eige suukses. Waat ich ouch fantasties vinj is ‘t Vèrkesbal. Ech eine topper dae veer nog lang in ere mótte haje. Wit se waat ich ouch leuk zól vinje: det de vereiniginge die nao de resepsie kómme allemaol ein ekt zólle bringe. Det is toch sjitterend veur alle miense? Jao en neturelijk had ich de Bóntje Aovende gaer trök. Mer dan waal mit gooj tekste, d’r mót ech get te lache zeen….” De lètste tied waert d’r in de gezet van alles gesjreve euver ‘t gemis aan samewirking tösse de Remunjse vastelaovesvereiniginge. D’r zeen d’r diej aan de peut van de Uulesjtool zaege, die wille ouch feesviere in de binnesjtad. Wiej kiek de Sjtadsprins van D’n Uul dao taegeaan? “’t Groot pebliek is neet gedeend van dees diskussie. En ich mis de humor in ‘t gesjtechel. Ich vinj det eder vereiniging zich in zien eige wiek mót ophaje en dao de luuj vastelaovend mót bringe. De Veldjmuus heite toch neet veur nieks Veldjmuus? “

Op ‘t inj van dit gesjprek Dorslustige Hoogheid, zeet Geer ‘t d’r mit ins det ter in Remunj väöls te väöl brillewinkels zeen?
Prins Paul II Hamers: ” Helemaol mit ins!”

Hans II Straus

Perseneel van de Prins

Prins en perseneel: achterste riej Serf Laarmans en Jeroen Vollebergh, veurste riej sjefäör John Büttner en regelnaef broor Frank

De Prins is belangriek veur ein vastelaovesvereiniging, neet veur nieks is hae de veurgenger in ‘t sjpeel. Mer veur de prins zeen zien adjudante, zien persjeneel, van laevesbelang. Det haet ouch Paul II Hamers begrepe en daorom koos hae es zien adjudante betroewbaar vrunj en femielie. Beveurbeeld zien zjwaoger Jeroen Vollebergh (39), djunior oppereter biej de Rockwool, dae samewoont mit Vivian de Bock (32), ouch ein dochter van Jo en Lia en ouch langk, sjlangk en blondj. Ze höbbe ein zeunke, Yannick van 4 jaor. De angere adjudant is geine onbekinde biej D’n Uul: Serf Laarmans (28), vertaegewaordigger biej groothanjel Rooswinkel. Serf is eine naef van Prinses Monique, hae leerde ‘t zjwaor vak van adjudant twee jaor geleje biej Bacchus Rob van Deurzen. Serf is aad-jeugprins (1987) van D’n Uul, hae is van plan van de zomer te gaon trouwe mit zien sjarmante vrundin Karin Willems (25), lerares oppe Widdonck. De zellefsjtenjigge óngernaemer John Büttner (41) is de sjefäör van de Prins. Ein sjpesjaal taak biej ‘t Prinselik gezelsjap is d’r veur Paul zien broor Frank, dae de ról van regelnaef, ein saort mederne Hansebus krieg. Frank is getrouwd mit Kara Martens (31), vertaegewaordigster in de appetekerswaereld. Ze höbbe twee kienjer: Cas van 6 en Nele van 3 en de derde sjproet is óp kóms.

H2S