Marc I (Mooren), leefhöbber van PK’s
“Good gesjmeerd löp altied baeter”

De nuuje prins van D’n Uul is Marc Mooren, suuksesvol remunjs ongernaemer en sins drie jaor aktief lid van oos sjoon vereiniging, wovan ‘t leste in ‘t besjtuur. Hae regeert es Marc I, waat veer sjpeels vertale es “mark one”, want noojt eerder waar d’r eine uule-prins mit ziene naam.
Greujts es t’r is op zien oetverkezing, is ziene dorslöstige hoogheid Marc I vasbesjlaote om d’r mit adjudante en dames veur alle Uule ein sjoon fees van te make. En naem van os aan: hae regelt det veur uch, want …
es eine det trek, dan is hae det! Hae regeert onger de liefsjpreuk: Good gesjmeerd löp altied baeter.

Foto: Peter Kessels

Veuraaf
Ein geheim kinne beware is get waerd, mer dinkelik is d’r nog noojt ein Prinse Keuze Kemissie (PKK) gewaes diej de zaak zo omzichtig en diskreet haet aangevlaoge es diej van dit sezoen. Gelökkig zoge ze op tied in det ze ’t Zjwetskammezaol in vertroewe mosde naeme en moogde veer ein aafsjpraok make, mer veer mosde zjwaere mit de handj op de vaan en mit oos uuleblood ein kontrak in drievoud ongerteikene. Det me det gaer duit, sjprik van zellef. 

Det geheimzinnige gedoons van de PKK haaj aevel zien gooj raeje. ’t Waar in de eerste plaats de wins van de nuuje prins. Es alles good gegange is, haet toet op ’t les nemes geweite waem achter det eine maske sjtook. Hoog-oet det d’n eine of angere meinde te weite det det Victor Adams waar – mer louw! Geer zeet d’r in gesjtonke.

Veer zulle uch de waore raeje verklappe, leef uule. De nuuje nuuje is namelik eine ras-echte uul. Hae woont aafgelaege, boete de sjtadse agglomerasie in Transautobahnia, in ’t sjilderechtige greun van ’t Maolbrook, kwasi es uul tösse de uule. Hae haet ’t sjtaon op väöl PK’s – waat op versjillende menere mot waere oetgelag – waat hem veural in dit jubeljaor van oos Prinsekepél enorm siert.

Mer det is allemaol nieks. Sins drie jaor dreug ooze nuuje prins de möts van de Raod van XI en ’t dageliks besjtuur. Det hae eine 18 karaats uul is, bewies zien eerste en deepste gedachte wiej d’r nao ’t gevraog waere op hoes aan reej. Det waar “Oe…!” – veur de ganse “oehoe” reikde ’t op det moment neet en det is begriepelik: de adrenaline sjtruimde en te väöl zake diej ‘m op det moment door de kop sjote. Mer daoveur bösse dan ouch zakeman en sjriefs-se dich Marc Mooren.

Mer waat had geer gedach, daomit zeen veer d’r nog sjteeds neet. Es geer de name van de adjudante heurt, dan ….
Laote veer uch neet in sjpanning haje – mer es ’t geheim bewaard is gebleve dan verbaas os det toch – want prins Marc haet zich weite te verzekere van de hertelikke sjteun van Jos Somers en Rob Schaepkens. Jao, geer laes ’t good: Jos, muibelsjtök van ’t DB, en Rob, de prins van 2006, zeen de adjudante. Det zal get gaeve, eine aad-prins dae adjudant waerd!

Veer sjtelle veur

Prins op ‘t witte paerd….

Marc is van 1966. Mit zien zöster, Christiane, greujde hae op in Neel wo zien mooder eine winkel haaj en zien vader ein graasj. Wiej Marc 10 jaor waar, verhoesde ze nao ’t Maolbrook. Paerd rieje waar toen al de grote passie van de femieliej. Marc kos (en kint) zich nao hertelös oetlaeve mit paerd. Dae naobele veervoter en troewe mitgezel van de miens is ein leefde veur ’t laeve en daomit de eerste dimensie van ’t begrip ‘PK’

Op konkoer in Sjtramproy

De paerd
Toet 1998 haet Marc aktief wedsjtriede gesjpronge. Daonao haaj hae geine tied meer, mer is hae aan ’t fokke gesjlage. Ouch haet hae eine tied langk ein pensjon veur paerd gehad. Euveriges woont Marc noe mit zien eige gezin, de leeftallige Natasha en döchterke Maureen (10 jaor), allebei gepasjoneerde amazones, in ’t aaje aajerlik hoes aan ‘t Maolbrook. Marc haet Natasja lere kinne wiej het mit eine troep ruuters aan kwaam bie ’t kefee wo hae ein glaeske beer zoot te preuve. De vonk sjprong medein euver en van ’t ein kwaam ’t anger. Dochter Maureen haet net es zien vader get mit D’n uul en het dans in de kienjergarde.

Luxewages
Marc volgde de middelbare landboewsjool, in Remunj, richting agraries kommersjeel. De eerste halte van zien offiesjele loupbaan waar ein landjboew-mechanisasiebedrief. Nao ein jaor switchde hae aevel nao de oetgaeverswaereld en de PK’s van de automobiele sector.
Mit de passie veur luxewages höbbe veer de tweede dimensie van ‘t begrip ‘PK’ te pakke. Marc haet ein zjwaak veur auto’s. Hae wirkde veer jaor bie de Trompetter wo hae veur de regio Helje-Hors advertensies verkoch veur ‘t autokatern. Indertied haet hae Rob Schaepkens lere kinne. Hae kreeg ein aanzeuk van de Maas- en Roerpos om de bielage Auto Informatief op te sjtarte. Det deej hae same mit aad-prins Thei van de Nedam. Marc deej alles: advertensies verkoupe, kontrakte aafsjloete, pagina’s opmake, doe kins ’t zo gek neet bedinke.

Traktore
In de tössetied begoste traktore ein sjteeds groter deil van ziene vrieje tied in besjlaag te naeme. (De derde dimensie!) Hae wis wiej diej dinger inein zitte en waar henjig genog, dus hae repareerde diej. In 1993 begos hae ein einmanszaak aan hoes. ‘t Bedrief waerde in 1998 “Mooren Machines” en vestigde zich in Leeve. In 2008 is Mooren Machines nao ’t pandj aan de Wirosingel verhoes, geer weit waal, mit dae traktor baove d’r-op. Anno 2012 bedeent Marc mit 17 mitwirkers vandao-oet naeve de agrariese ouch de parteklere mert, want häöf en parke motte ouch masjienaal biegehaje waere.

Trekkrach
De vastelaovend in Marc ziene laeve is neet bie D’n Uul begos, mer aan de Kepél. Es veerteenjaorige, nog neet ins ’t riejbewies op tes, besjtuurde hae de traktor dae de optochwage van sosjeteit SOFA trok. Ein heel deil jaore zoot hae veur de Kaketoes op de boek en waar hae lid van dees sympathieke vastelaovesvereiniging. Mer laot os d’r rondj-oet veur oetkomme: ongertösse kinne ze ‘m euveral in Midde-Limburg. Allein al in de remunjse optoch van veurig jaor waar Marc mit meer leefs 14 traktore van de pertiej!

Mit dochter Maureen in vastelaovespékske

Anger ervaringe
Ouch aan ’t prinssjap haet hae al ins veurzichtig kinne ruuke es kefeeprins. Mer det is ongertösse eine ganse tied geleje …
De feesjes van ’t AAS ’s zomers in de haof van ziene aaje naober, ‘meun’ Loek Graus, sjproke mit häör feestelikke lempkes en ’t gerous en getempees van aafsjtandj toet de verbeelding.
Drie jaor geleje haolde vrundj Rob, noe ziene adju, en Jo de Bock, ‘m euver om bie D’n Uul te komme.
Mit Jos zoot hae in de techniese kemissie. ‘t Faciliterende werk sjprik Marc erg aan.

Thoes (Foto: Rob Kitslaar)

Gevraog
Aafgeloupe zomer leet Jos Somers doorsjemere det hae waal in de mert waar veur eine heftruuk van Marc. Op de aafgesjpraoke daag en tied kwaam Marc mit de vrachwage nao Maerum, mit ’t begeerde model op de laajbak. Sjting dao in diej loods obbins de ganse PKK. Marc wis netuurlik medein wiej laat of det ’t waar. In plaats van eine gesjlaagde deal kreeg hae mit ziene eige heftruuk get gans angers veur de vot gesjörg (veer bedoele det in de meis positieve beteikenis van ’t waord, UUL). Wiej bleek det zien veurwaarde koste waere ingevuld – Natasha mos akkoord zeen en in ’t bedrief mos zien aafwezigheid kinne waere opgevange – waar ’t antjwaord “Jao gaer en ich bön heel erg vereerd”.

Foto: Peter Kessels

Trekker
En dus moog hae noe in 2012 zellef de ker trekke es Marc I van D’n Uul. En waat veur ker: de sjoonste van de ganse waereld! Ziene dorslöstige hoogheid waardeert de vastelaovend enorm es ’t fees van same optrekke, lekker de sjtraot op, same ontsjpanne, effe ein paar daag de remme los en ’t gezellig höbbe; effe gein zörg aan de kop, mer waal mit diej ganse sjoon uulefemieliej, de raod van XI en de Damesgarde get neerzitte wo ’t plezeer vanaaf sjpöt en zorge det ederein ein fantasties fees belaef!

Feesjaor
Marc sjpits zich op alle agendapunte diej gepland sjtaon. Mit ’t jubileum van de Prinsekepél, diej dit sezoen 6×11 viert, zal ’t begrip ‘PK’ veur hem ein veerde en nuuj dimensie kriege. Es sjtrak alles achter de rögk is, waerd hae opgenaome in de Aad-Prinse Klup, en det is dan de viefde dimensie. De adjudante diej Marc zich haet oetgezoch zulle toet ’t uuterste gaon. Ziene sjofäör, Piet Opbroek, is al jaore ziene sjteun en toeverlaot. En de maedjes – Natasha, Carolien, Gerty, en Anny – trekke same op. Zie zulle ’t prinselik gezelsjap in ziene slip stream volge, mer neet euveral, want ze wille de here ouch de vriejheid laote. Det mot!

Good gesjmeerd …
Es leefhöbber van väöl PK’s haet Marc netuurlik ein motto det zich op versjillende menere leut begriepe: “Good gesjmeerd löp altied baeter”. Veer dene det veural in de letterlikke beteikenis op te vatte: es ein techniese installasie neet meer (zo good) löp, sjmeers-se d’r get op of sjpöts-se d’r get in, en voila, dan löp ‘t baeter. Zuus-se ’t masjien es metafoor veur de miens, dan beteikent ’t det ein glaeske beer döks wonjere duit.

Foto: Peter Kessels

Organizere
Tiedes oos bezeuk aan ’t Maolbrook kriege veer inderdaad de indrök det dit prinssjap wiej gesjmeerd geit loupe … det deej ’t namelik al wiej veer dao ware! Ouch dit kint geer begriepe wiej geer wil, mer nog noojt eerder höbbe veer gezeen det de veurbereidinge zo vreug zo wied gevorderd ware! De möts vaerdig, de vaere op taofel, de proklamasie klaor, de hoesordes geleverd … zellefs ein aafsjpraok waar gemaak veur ’t make van de foto’s.
Apropos hoesorde: Marc haet gekaoze veur ein blinkende medalie aan ein sjtevig greun lintj. ’t Is de beeltenis van ein trekkerke det hae verköp, mit op de kap ziene liefsjpreuk.
Waem zien zake zo good veur elkaar haet, kint neet angers es eine gooje prins zeen veur D’n Uul! Dorslöstige hoogheid, proficiat, en gaef gaas!

Jean-Philippe Laugs