“En noe … ff Kes!”
Mit Roger Kessels (34) es Prins Kes de Eerste is
D’n Uul zeker van eine unieke veurgenger.

“Heel biejzónjer toch?
Jóng van ’n dörp is noe Sjtadsprins van Remunj !”

Ein bietje ajer laezers van dit blaad kinne zich neturelik allemaol John Wayne veur de geis haole.
Zeker esse leefhöbbers van koiboifillems zeen. John Wayne det waas dae sjtoere bink oet ’t Wilje Weste dae minnige sjoef of Indiejaan d’r neerloog es det neudig waas. Nou, aan dae grote kaerel mós ich drek dinke wiej ich kinnis had gemaak mit Roger Kessels, de nuje Sjtadsprins van D’n Uul. Wiezo? Ómdet Kessels ouch zo langk en zo breit waas es John Wayne? Nae, waeges ziene gangk. John Wayne hat ein tiepiese luipke, Robert Mitchum trouwes ouch. Eine loup dae neet te ómsjrieve vèlt, kómmend vanoet de heupe, bekiek ‘m maar ins good es geer ‘m sjtrakkes taegekómp: Kessels löp persies zo. Biej die twee koibois kwaam det vanwaege ’t paerdrieje, de nuje Uleprins riet Alfa Romeo, dao kint ’t dus neet aan ligke. Juus es Wayne en Mitchum is Roger Kessels eine fórse vent. Ouch haet hae nog zjwarte haore. Missjiens get langk in de nek, mer alla, es de möts mer pas. En Roger is eine kaerel dae gaer lach. Det is altied gunstig veur eine Prins en ouch begriepelik. Want waem zól neet lache es d’r Prins van D’n Uul is? De nuje heerser euver ’t Uuleriek is alweer de 64ste in de gesjiedenis van de Sjtadsvastelaovesvereiniging en de viefteende dae óngergeteikende in dees gezet d’r neer moog zitte. Wo blief de tied?

‘t Prinselik gezin: Nathalie, dochter Isabelle, Roger en Sterre.

Wiejwaal Roger Kessels vanzellefsjpraekend eine grandiejoze Prins waert, mót d’r toch get deile mit ein van zien veurgengers. Naodet Henri Timmermans in 1966 de door zien vader en moder biej zien gebaorte gegaeve naam neet wilde kinn en zich prins Tim 1 leet neume, duit Roger Kessels ‘m noe nao: hae neump zich Prins Kes d’n Eerste! “Ech waor, ich bön Kes d’n Eerste. Ónger deze naam kint heel Remunj mich, mien femielie, mien vrunj, mien kellegaas en mien klanjte. En sjtrakkes kinne ouch de vastelaovesvierders mich zo. Wèdje make?” Veer gluive Ziene Dorslustige Hoogheid op zien waord. Want hae kint gans euvertugend euverkómme!

De kleine Kessels wiej d’r veer
jaor waas op ziene eerste fiets.

D’r is trouwes nog get apaarts aan Roger Kessels, naem mich neet kwaolik, Kes 1. De nuje Prins is namelik neet in Remunj gebaore! Det is neet zo apaart, zegk geer, höb geer ouch weer geliek in! Effeng, Roger ziene weeg sjtóng in Klein Peries, in Heytse dus. Dao sjreefde hae 34 jaor geleje
veur de eerste keer “Alaaf!” Det leerde hae van zien vader Jo, vastelaovesvierder in hert en nere en bezaete lid van de Heytser joekskepel “”Wiezo vals?” Neet det hae get taege zien gebaortedörp haet, mer euver Heytse sjprik Roger neet zo heel väöl meer.

Zien vader en moder wone d’r nog waal en geit neturelik nog regelmaotig op bezeuk in ’t hoes van zien elders, mer verder, nae, ’t is allemaol Remunj waat de klok sjleit. “Klop, ich bön al jaore helemaol op Remunj gerich. Hiej woon en wirk ich, hiej höb ich mien sjtamkefee en hiej höb ich mien maedje lere kinne.”
Veurdet Roger nao Remunj kwaam, deej hae in Häör de havo op ’t Ursula en in Zitterd de heao. Ongertösse leep hae in Mestreech sjtage biej eine verzekereer en ging eder waekinj op sjtap in Remunj. “Jao, oppe Veldjsjtraot, in ’t Häöfke. En dao leerde ich dus Nathalie Pollaert kinne.
En zo is ’t gekómme!

’t Waas leefde op ’t eerste gezich en Roger en Nathalie ginge in 1995 samewone baove de heremodezaak van de toendertied Melickse wethajer Frans Claessen oppe Mert in Remunj. Nae, ze zeen nog altied neet getrouwd en väöl van häör vrunj ouch neet. Roger mit ein knipuigske: “Samewone haet ouch zien veurdeile!” Oppe Mert begós Roger ouch es verzekereer veur Reaal in de regiejo Limburg, nao angerhallef jaor vertrók hae nao de ING-bank en weer angerhalf jaor later begós hae biej verzekeringsmaatsjappie Winterthur woveur hae nog sjteeds wirk, noe es akkountmennezjer laevesverzekeringe. Det duit ter van hoes oet aan de Standerdmolen in de nuuj Hertense wiek Molenveld.
Op dit adres woont ’t paar Kessels- Pollaert noe vanaf 2000 en hiej ouch sjonk Nathalie (36) ’t laeve aan twee dochters: Isabelle (4) en Sterre (16 maondj). Nathalie wirk driej daag in de waek biej ein oetzendbero en is de dochter van Jacqueline en Harrie Pollaert, de lètste is eine naef van Uulekloon “Bibi” Bierbaum zaliger en in Remunj oojt waereldberoemp es oergeverelikke sjpits van de RFC-veterane.

Joekskepel Winjdkrach 11. Helemaol rechs mit dieke tróm Sjtadsprins Kes d’n Eerste.

Terwiel Nathalie, sjoon en sjarmant, de vastelaovend leerde kinne es lid van de eks-jeuggarde ónger leijing van Annette Engelen, kwaam Roger in zien nozemjaore vanoet Heytse mit zien vrunj in de Veldjsjtraot en ’t Sjtasieplein. In dae tied waerde ouch de joekskepel “Windjkrach 11” opgerich, die besjtóng oet vrunj van veural Herkebós en Berg. Roger sjloog de dieke trom. De prins vertèlt: “De kepel besjtóng 10 jaor en veer wólle dit jaor ein gezellige biejeinkóms haje. Mer de lètste keer hat miene vrundj Roger Nelissen, dae makeleer is en dus ruumte wis, de instremente opgebórge in ein appartement Achtermegaard. Wiej veer det sjpul noe óp wólle gaon haole waas de flet verkoch en de instremente pleite. De biejeinkóms is versjaove nao later.” Oet alles bliek det Roger naem mich neet kwaolik, Kes Kessels heel greujts is detter Sjtadsprins van D’n Uul is. “Manne, ich bön d’r kepot van. Eine jóng oet ’n dörp Sjtadsprins van Remunj, det is toch boetegeweun! Veural ouch ómdet ich mich helemaol Remunjeneer veul.

Mien gans sosjaal laeve sjpeelt zich hiej aaf, ich tennes biej NIP en bön de toepkeuning van de Amstelklup en van Braam.” En Nathalie: “Roger is eine echte sjportman, ouch waat zien feguur betruf. Kiek sjtrakkes mer ins nao zien sjoon bein in de mejo. “
Waat beteikent vastelaovend veur de nuje Prins? Roger drek: “Veural heel väöl plezeer make, alle zorge opziej zitte, de geweuntes de deur oetdoon en de knoep omdreije.
Ich haaj van danse en zinge, drink gaer ein pilske aevel sjtómzaat hoof neet!”Waat zeen veur hem de hoogtepunte van de Remunjse vastelaovend? Kes d’n Eerste: “De Sjtasiefestasie neturelik, waat ein fees en waat ein luuj! En dan de binnezitting sóndags in Le Journal en ’t Kwartjesbal in de Amstel.

Mer baove alles is veur mich de grote topper: ’t Verkesbal, det is ech uniek.”
En wiej kiek de de sjattebout van de Prins en de moder van zien kienjer taege de kómmende (drökke) tied aan? Nathalie: “Ich wis det Roger al heel lang heel gaer Prins wól waere. Ich weit ouch det hae ’t kint. En ich gun ‘t ‘m oet de gróndj van mien hert. Ich vinj zellef de veurbereijinge erreg leuk, ich doon gaer mit en höb gelökkig in de opaas en omaas heel gooj miense die oppe kienjer passe.

Hans II Straus

Prins Kes I tösse zien adjudante Dennis van de Beucken
en LeeWilson en de sjeffäörs Roel Bremmers en Harrie Pollaert

Veur de keus van zien persjeneel haet de nuje Uuleprins neet ver hove te zeuke. In zien femielie vónj hae genóg gooj miense. Zo koos Ziene Dorslustigge Hoogheid zien zjwaoger Dennis v.d. Beucken (28) es ziene eerste adjudant. Dennis, gebaore in Baoksem, woont in Herte same mit Veronique (27), ’t zösterke van de prins. Dennis is projekleijer biej Philips in Eindhoven.De tweede adjudant is eine boetelenjer. Det is nog noojt dao gewaes in de geschiechte van D’n Uul en van ’t Aad Adjudante Syndikaat, det waal ’t zjwart geldj, mer zien leje nog noojt boete de grenze haet hove te zeuke. De naam van de goje miens is Lee Wilson (38) en ’t is eine orzjenele Sjot. Ziene weeg sjtóng örges tösse Glasgow en Edinburgh, mer ’t kint ouch in de buurt van Loch Ness zeen gewaes of in de High Lands. Lee, dae in ziene vrieje tied ein rökske dreug, haet ein tegniese funksie in de sjtaolindestrie en woont same mit Nathaly Perey (30), jaowaal, de jóngste dochter van Aad-Uule jubeleijemprins Jos II Perey (1981) dae väöls te vreug van ós weg is gegaon. ’t Sjtel woont in Remunj oppe Willem II Singel oftewaal de Nuje Boelvaar.
Es veer lètte oppe sjpraekwaordelikke zunigheid van de Sjotte, geit deze adjudant hoogswaarsjienlik de fienansieje van ’t prinselik gezelsjap regele.
Neturelik leut de prins – es d’r eine sjloek op haet – zich rieje.
De nuje veurgenger van D’n Uul haet zellefs twee sjeffäörs, zodet eine van de twee altied kint blaoze es de pliesse van Remunj det wille. Prinselikke sjeffäörs zeen aad-RFC-veteraan en VUT-ter Harrie Pollaert (64), sjoonvader van de prins en Roel Bremmers (29), de angere prinselikke zjwaoger.

H2S