Prins Sjors I
Det is de liefsjpreuk van oze nuuje Sjtadsjeugprins van Sjtadsvastelaovesvereniging D’n Uul 2016, Sjors I Smeets dae same mit zien twee adjudante, te weite Mick Overdijk en Scay Fonke, de Remunjse jeug moog veurgaon es Sjors d’n eerste. Mit z’n drieje kieke ze d’r al een tiedje nao oet om d’r same ein sjpektakel van te make veur jónk en aad.
Sjors I is ‘ne echte Remunjse jóng, 1 mei 2004 gebaore midde in ‘t Uuleriek, aan de Godsweerdersjtraot. Zien pap en mam Harald Smeets en Esther Verhagen zeen gein ónbekinde in de Remunjse vastelaovend en ouch zien zusje Björk sjitterde al ‘ns es prinses! Sins kort wone ze oppe Geuljanslaan, lekker dich biej de skatebaan. Mit ouch nog ‘ne kanarie en twee vèsse.
Sjors I is opgegreujd mit de Vastelaovend. Same mit zien zusje duit d’r al jaore mit aan de Kienjermiddaag van D’n Uul. Zien vader waas in 1983 ouch al Sjtadsjeugprins van D’n Uul. En hae is de zoon van Herman ( de opa van Sjors dus) van de indertied zeer populaire kroeg “Herman’s Bierboetiek” aan de Sjuiteberg.
Det kefee zal biej völ eljers nog waal bekind zeen…
Sjors zien Oma, Mariette Coenen, sjpeelde vreuger altied mit in de Bontje Aovend van Remunj. In 1995 waas pap Harald adjudant van Bacchus “Jos I” Becks. Mer ouch mam Esther waas al ins adjudant van Bacchus. Namelik in 2011 biej Bacchus “Jean I” Cox. En neet te vergaete Bacchus “Loek I” Smeets dae in 1998 ‘t nog altied bekinde Bacchus-leedje “Mien Klup” waal meer dan 1000 keer haet gezónge, is ‘ne ome van Sjors I.
In ‘t dageliks laeve geit ouch Sjors I geweun nao sjool.
Namelik de “Sjteine Brök”, in groep 8, biej meister Nicky. Zien adjudante Mick en Scay zitte biej hem in de klas.
Sjors duit ouch gaer Taekwondo. Dao mót hae hel veur traine biej Lesley’s Sjportstudio. Sjors is zo good det ter in 2015 zelfs eerste is gewaore op de Zuid Nederlandse Kampioenschappen. Verder maak Sjors gaer meziek op zien elektrische gitaar en haet ter same mit zien adjudante ein super vet vastelaovesleedje gemaak. Ze verheuge zich noe al op häör optraeje. En veural op de Sjolefestasie!!
Es Sjors van al det sjporte en meziek make honger haet gekrege it ter ‘t leefste eine pizza biej Tony, maar dae waat zien mam zelf maak is ouch heel lekker…
Sjors en zien adjudante zeen al heel lang vrunj. Scay Fonke is op 4 fibberwarie 2004 gebaore in Remunj. Zien eljers zeen Patricia Valkenburg en Joep Fonke. Scay woont midde in ‘t Uuleriek, oppe Sjuiteberg. En ouch Scay is ‘ne sjportieve jóng, hae sjpeelt mit väöl plezeer handjbal biej Sjwift.
Sjors I ziene angere adjudant, Mick Overdijk, is op 11 december 2003 gebaore in Paarlo. Zien vader en mooder zeen Gerrion Becks en Gerard Overdijk. Ze wone vlak biej Sjors aan de Buusjop Lindanussingel. Mick is ouch ‘ne sjportieveling en duit aan Taekwondo biej Lesley’s Sjportstudio, same mit Sjors I en atletiek biej Sjwift.
Sjors I haet veurig jaor mit Scay en Mick same vastelaovend gevierd. Toen zeen ze ouch biejein blieve sjlaope en dao höbbe ze ‘n heel sjpektakel van gemaak…
‘t Waas dan ouch neet moeilijk óm zien adjudante te keeze en de zeer toepasselike sjpreuk te bedinke. Miet häöre liefsjpreuk Nieks mót, alles kan, veer make d’r ein sjpektakel van! gaon zie de Vastelaovend 2016 in.
