Prins Paul III
Mit Paul in de sjpitz maake veer de blitz
Dao zit meziek in !
Mit dees äöpeningszin doon ich rech aan ’t feit det ich de eer höb aan uch te moge veursjtelle de nuje Jeugprins van Sjtadsvastelaovesvereiniging D’n Uul:
Ein menke wo meziek in zit !
Ein grote belofte veur dit sezoen! Want oze Paul is neet allein ein belofte veur de vastelaovend mer ouch veur de voetballeriej. Veer höbbe dit jaor te make mit ein voetbalprins van SVC. Mit ’t oug op de WK in Pruusses is ’t neet gek det de keus op hem gevalle is. Want in Remunj haje veer naeve de vastelaovend neturelik van Keuning Voetbal, waat wils se dan nog meer mit eine Prins Voetbal Voetballe en Vastelaovend zeen Paul mit de paplaepel ingegaeve . Hae is gebaore op15 maart 1995 in ein ech Uulenès en woont, en det is ech waor ,in de Remunse binnesjtad oppe Singel! In ‘t laeve van edere daag geit hae door t laeve es Paul Sangers. Hae is de aajste zoon van Jannie Sangers en Bettie Bremmers. Hae haet ouch nog ein breurke Tuur ! Vastelaovend viere en voetballe haet hae van geine vraemde want ziene pap Jannie is veur minnigge Remunjeneer gein ónbekinde! Dit jaor höbbe veer te make mit ein groot jeugprinselik gezelsjap. Oze prins haet al van kleins-aafaan drie gooj vrunj, dao deilt er al zien sjooljaore mit. En of geer het gluif of neet , hae en zien kammeräöj mótte in de klas opboekse taege viefentwintjig vrouwluuj, maedjes! Want ziej zeen de insigste jongens in de klas. Geer zólt uch aafvraoge op waat veur ein sjool kump zo get noe veur? Oze Jeugprins geit nao de Sjteine Brögk op sjool! Hae zit in groep 7 biej meister Han ( in 1988 waas dae adjudant van Jeugprins Friso I) en juf Nicole. ‘t Is veur dees veer here meujelik gewaes óm te mótte zwiege mer det hadde ze zich good aafgesjpraoke. Ze hadde ein bepaold waord bedach. Ich moog det noe verklappe. Det waord waas “voetbaltoernooi”. Kóste ze häöre mondj neet meer haje en móste ze ‘t effe kwiet dan sjproke ze in geheimtaal euver ‘t voetbaltoernooi, en bedoelde dan ’t aankómmend Jeugdprinssjap!
Paul had noojt gedach det hae de veurgenger van de Kienjer van Remunj zól waere, hae had zich ein kleiner ról toebedach namelik Prins van de Sjool. Veur Paul kump noe eine grote wins oet, get wo d’r neet van had dörve te druime en om erelik te zeen hae is toch lever Sjtadsjeugprins van Remunj dan van zien sjool. Mer hae vindj ‘t super óm es Sjtadsjeugprins zien sjool te moge kómme bezeuke Paul haet de rolle verdeild en es zien adjudante haet hae beneump; Mees Vermeulen, ouch eine voetballer mer dan van ein anger Remunse klup SHH oet Herte en Camiel van Bilsen, dae haet gegevoetbalt mer haet d’r noe aeve geine zin in, hae sjient de maedjes beheurelik leuk te vinje! Ziene derde vrundj is Vincent Roumen, ouch hae is eine voetballer van SHH. Vincent waert de sjeffäör en regelmeister van dit gezelsjap. Hae haet ein ech riejbewies veur Jeugprinseverveur.
Mit häör vere höbbe ze d’r väöl zin in. Ze zeen al ein bietje gewind aan optraeje en ich höb heure fluustere det ze meugelik eine “rep” gaon bringe deze vastelaovend, want ze zeen alle veer fen van Ali B!