Prins Ceryll I

Ceryll Aubert jeugprins.

In ‘t jaor det ‘t motto van D’n Uul Kiek ins nao det veugelke is, zal Ceryll Aubert de Remunjse jeug en Sjtadsvastelaovesvereniging D’n Uul veurgaon es Jeugprins Ceryll I.
Ceryll is, dink ich, geine onbekinde in ‘t Remunjse, hae is gebaore op 15 jannewarie 1993 en haet ein zöster, Tamara, det haet nog gedans biej de Kienjergarde van D’n Uul ein aantal jaore geleje.
Zien elders heite Chris en Truus Aubert en ze wone in Herte.
Chris is veurzitter van vastelaovesvereniging De Kaketoes van de Kepel en ouch nog besjtuurslid biej de B.C.L.
Oze Jeugprins Ceryll zit in groep 7 van de St.Jozefsjool in Herte biej meister Jan en juffrouw Saskia.Zien anger hobbies zeen volliejel, zinge biej ein keurke vieja sjool en zien knien. Meziek oet Kölle is zien alles, dao kint biejnao geine angere meziek taege-op, vintj hae. Ceryll I vintj ‘t ein ganse eer om Jeugprins te moge waere biej D’n Uul en neet allein hae, mer ouch zien twee Adjudante höbbe d’r zin in.

 

De eerste Adjudant hit Marco Quicken, is gebaore op 06 september 1994 en woont in Remunj. Marco haet ein zöster, Linda, zien elders heite Karin & Eric Quicken.
Ouch Marco haet de vastelaovend van gein vraemde, ziene pap Eric is aafgeloupe jaor Prins gewaes van De Kaketoes en Marco ging bienao euveral mit nao toe. Marco zit in groep 6 van de St.Alfonsussjool in Remunj biej of juffrouw Ria, Els of Marieke.
Zien hobbies zeen de scouting St.Hubertus en vesse.Rens Loven is dit jaor de tweede Adjudant van Ceryll I, hae is gebaore op 20 julie 1992 en woont ouch in Herte. Rens haet ein broor, Maarten, zien elders heite Mieke & Jo Loven, en ouch dees Femiliej hilt van vastelaovend viere.Rens zit in groep 8 van de St.Hubertussjool in Herte biej meister Johan en juffrouw Miet, es grote hobbie duit d’r voetballe biej S.H.H.-D2 in Herte.
Wiej ich al hiejbaove sjreef, ze höbbe d’r zin in en zeen ‘t kómmend sezoen es ein groot hoogtepuntj, mer veural de grote Optoch door Remunj, det mót ‘t waere. Neturelik kiek Ceryll alweer veuroet, want taege ‘t aaftraeje kiek d’r waal op, mer zover zeen veer nog lang neet.

De Adjudante weite al persies waat ze mótte doon, beveurbeeld limmenaad haole, prinsemöts aafdoon biej ongersjeiinge, köfferke mit hoesordes drage, de septer good bewake en-zo., allein nog neet waem waat duit, mer det kump ouch waal good.Samegevat, veer gaon mit Ceryll I Aubert en zien twee Adjudante Marco Quicken en Rens Loven ein sjoon sezoen kriege, en det alles onger ziene liefsjpreuk:

Rood, gael, greun, veer blieve geweun.

Erik Snoek