Remunjse Uulejach 2024
Oetneudiging veur de Uulejach 2024
Bèste kienjer van Remunj,
Is ‘t ’ne vóssejach? Nae heur, veer gaon dit jaor weer op zeuk nao Uule!
Op zaoterdaag 20 jannewarie 2024 begint op ‘t Munsterplein de derde ediesie van de Remunjse Uulejach, ‘ne vóssejach mit ‘n vastelaovestintje!
Tösse 13:30 oer en 15:30 oer zólle d’r in de binnesjtad van Remunj allerleij Uule te vinje zeen en ‘t is aan uch óm die te gaon vinje. Doe kins mit ‘n gruupke kienjer mitdoon en toet 15:00 oer ‘n sjtempelkaart kómme ophaole op ‘t Munsterplein, bie de kiejos. Daonao geis se mit dien gruupke in ‘t sentrum op zeuk nao de 11 Uule. Óngerwaeg is ‘r vanalles te belaeve en kums se mesjiens zelfs waal ‘ne talentejaeger taege…
App dien vrunj en vrundinne en doot mit aan de Uulejach 2024. Alle kienjer zeen wilkóm! Es se sjlum bös kums se verkleijd en geschmink, want ‘r zeen sjoon prieze te winne. Doe kins netuurlik ouch mitdoon mit dien klasgenote, sjportteam, vastelaovesvereiniging, scouting- of dansgroep óf mit dien kleuternaefkes in de tweelingbuggy! Es se alle sjtempels höbs verzameld, höbbe de Sjtadsjeugprins van d’n Uul en zien adjudante mesjiens waal ‘n hoesorde of ‘ne angere pries veur dich.
Veer haope det se mitduis. Alle kienjer zeen wilkóm en deilnaeme is veur nieks.
Toet zaoterdaag 20 jannewarie 2024!
Mit vruntjelike groet,
Wirkgroep Uulejach
Sjtadsvastelaovesverening D’n Uul Remunj
